Namaskar dosto, main KD Patel aapka swagat karta hu meri simple si website ke Geopolitics blog me. Aaj ka blog bahut hi important hai kyunki aaj ke din China ke videsh mantri Bharat ke daure par aaye hue hain.
Inki meetings hamare Videsh Mantri Dr. S. Jaishankar ji aur Rashtriya Suraksha Salahkar Ajit Doval sahab ke saath bhi ho rahi hain. In meetings se kaafi positive baatein saamne aa rahi hain jo Bharat ke hit me hain.
Bharat ke kai projects me hame fayda mil sakta hai, jaise Bharat ke Bullet Train program me bhi China ki taraf se help milne ki sambhavna hai. Lekin agar main apni personal rai du to hame China se ek cheez zaroor seekhni chahiye – wo apna narrative duniya ke samne kis tarah pesh karte hain. Jaise hi China ke Videsh Mantri Bharat aaye turant Chinese social media handles ne yeh post karna shuru kar diya ki ‘India ne Taiwan ko China ka hissa maan liya hai'
Maine kuch posts ki links di hain, aap unhe check kar sakte hain
Now yahan par aap iss tweet me dekh paoge Taiwan is part of China. Bharat ke Videsh Mantri Subrahmanyam Jaishankar ne ye baat China ke Videsh Mantri Wang Yi ko convey kar di. Main yahan clear karna chahta hoon ki ye totally false baat hai. Iss tweet me jo bhi likha gaya hai sab kuch galat hai aur ajeeb baat ye hai ki ye khud Chinese officials ne likha hai.
Ham log Taiwan ko ek independent country nahi maante, lekin China hamesha ‘One China Policy’ ki baat karta hai aur uske under Taiwan ko apna hissa batata hai. Lekin aapne dekha hoga ki kaafi time se hamare Videsh Mantri ya kisi bhi neta ne ‘One China Policy’ ka zikr nahi kiya hai. Iska ek simple reason hai China ne kabhi ye nahi maana ki POK (jo Kashmir ka part hai aur jisme Pakistan ne kabza kiya hua hai) Bharat ka hissa hai
Ab sawal ye uthta hai ki hamesha hume hi kyon kehna chahiye ‘One China Policy’? Aur aapke mind me ye doubt bhi aata hoga ki aakhir Chinese media aisi baatein kyon faila raha hai?
Simple si baat hai China apni propaganda machine chalata hai. Ye news apni janta ko bhi dikhayenge ki Wang Yi Bharat gaye unka grand welcome hua aur 3 saal baad India ne officially maan liya ki Taiwan China ka part hai.
China me to iss narrative ko lekar celebrations bhi ho rahe hain. Saath hi ye bhi dikhaya ja raha hai ki Donald Trump ke karan India US relations bigad gaye hain.
Aap note kijiye jab Wang Yi Bharat aaye aur Dr. Jaishankar ji se mile tab unhone ek khas line boli jo USA ko indirect reference karti thi. Wang Yi ne kaha ki aaj ek aisa desh hai jo unilateral actions le raha hai aur apne power ka misuse karke chhote deshon ko bully kar raha hai.
Unilateral ka matlab hota hai jab koi desh apni taraf se hi bina kisi aur country ya international community se consult kiye action lena shuru kar de. Aur bullying ka matlab hota hai apne se chhoti ya kamzor country ko power aur strength se dabana ya dhamkana. Ye baat openly China ke Videsh Mantri bol rahe the.
China ki policy aisi hi hai jahan bhi unko mauka milta hai, turant apna narrative push karte hain aur action lena shuru kar dete hain
Ab baat karte hain Donald Trump ke ek bade blunder ki. Trump ne India US relations ko kai saal peeche dhakel diya hai. Aur isi situation ko China ek badi opportunity ke roop me dekh raha hai. Jis country ko US Asia me China ka rival banana chahta tha China ab usse apna dost banane ki koshish kar raha hai.
Aur agar aap soch rahe ho ki China ye dosti kaise dikhayega to iska jawab hai practical steps le kar. China ne yahan par teen bade decisions liye hain.
Sabse pehla China ab Bharat ko fertilizer supply karne ke liye ready ho gaya hai. Official confirmation bhi aa chuki hai ki China Bharat ko urea supply karega.
Dusra, rare earth minerals ka issue. Pehle China ne rare earth minerals ke export par ban laga diya tha, jiski wajah se Europe US Australia jaise deshon me badi manufacturing companies pareshaan ho gayi thi.
Chahe wo car manufacturing ho ya heavy machinery sab jagah rare earth minerals ki shortage ki wajah se production slow ho gaya tha. Lekin ab China ne Bharat ko ek badi relief di hai. Ab lagataar rare earth minerals India me aate rahenge, aur hum unhe purchase kar paayenge .
Ab obvious hai ki hum sab chahte hain ki Bharat jaldi se jaldi is mamle me atmanirbhar ban jaye. Lekin isme time lagega. Filhal jab tak hum rare earth minerals me self dependent nahi bante tab tak hume China ki supply par depend rehna padega.
Aur main yahan kehna chahunga ki ye Quad countries ka ek bada failure hai. Mujhe yaad hai kai saal pehle Quad nations ne decide kiya tha ki rare earth minerals ke liye apni supply chain banayenge ek dusre ko support karenge aur self dependent banenge.
Lekin ground level par kuch khaas nahi hua. Biden ne apni presidency ke last kuch saalon me Quad ko limited attention di aur Trump to apne decisions se Quad ko almost destroy hi kar gaye. At least for the time being Bharat ko China ke rare earth minerals milte rahenge.
Iske alawa ek aur important issue hai Tunnel Machines. Jaise aap sab jaante ho Bharat me Bullet Train project chal raha hai. Ye project ek time par atak gaya tha kyunki China se jo tunnel boring machines aati thi unka export rok diya gaya tha.
Ye badi surang khodne wali machines Bharat German company se purchase karta tha lekin wo German companies bhi apna manufacturing order China ko deti thi. China ko pata tha ki ye machines Bharat ke Bullet Train project me use hongi isliye unhone export rok diya. Isi wajah se hamara Bullet Train project delay ho gaya
Ye delay ho gaya tha, aur aap sabko yaad hoga 2024 me ek video bhi saamne aayi thi. Is video me Bharat ke Commerce Minister Piyush Goyal ji openly Germany ke Economy Minister Habeck se baat kar rahe the. Unhone ΰ€Έाΰ€« ΰ€Έाΰ€« kaha tha agar tum log apni machine khud bana nahi sakte aur ultimately sab kuch China se hi aata hai to phir hum Germany se purchase kyu karein?
Unhone openly point out kiya tha ki German companies tunnel boring machines supply karti hain jo actually China me banayi jaati hain aur China ne unhe India ko export karne se rok diya. To jab sab kuch China se hi aa raha hai to phir Germany se kharidna ek tarah se waste hai.
Ab dekhna yeh hoga ki recent announcements ke baad jo German orders diye gaye the kya wo complete honge? Ya phir Bharat directly China se hi tunnel boring machines purchase karega. Agar India directly China se machines kharidta hai, to iska matlab hoga ki hum apne Bullet Train jaise mega projects ke liye China par aur zyada dependent ho jaayenge
Ye ek bahut badi geopolitical development hai. Isse finally hamare Bullet Train projects jo kai mahino se atke huye the ab aage badhne shuru ho jayenge. Aur lagta hai ki Ahmedabad Mumbai Bullet Train project bhi complete hone ki raah par hai.
Ab aap soch kar dekho, rare earth minerals ko lekar USA kitna zyada concerned hai. Filhal to thodi bahut supply China se aa rahi hai lekin kal ko agar China ne phir se supply rok di to US ke car manufacturers solar panel manufacturers aur high tech industries ka kya hoga?
Isi wajah se Trump ek naya idea explore kar rahe hain Balochistan me jo rare earth minerals hain unko extract karne ka. US ko lagta hai ki Balochistan me kaafi badi deposits hain aur unhe American companies nikal sakti hain.
Is context me aapne dekha hoga ki recently USA ne Balochistan Liberation Army (BLA) ko ek terrorist organization declare kar diya. Yeh step isi wajah se bhi hai kyunki US chahata hai ki Balochistan ke resources pe control bana sake. Saath hi Balochistan freedom ke issue par US Pakistan government ko support karta dikh raha hai, is umeed me ki wahan par large-scale mining possible ho sake.
Lekin aage dekhna hoga ki agar kal ko jis tarah se Chinese nationals par attacks hote rahe hain Balochistan me waisa hi scenario American nationals ke saath hua to phir US ka reaction kya hoga.
Ab aap samajh sakte ho ki rare earth minerals ka export aaj ke time me kitna bada issue ban chuka hai. China jo steps le raha hai chahe rare earth minerals ke supply ko lekar ho tunnel boring machines ko lekar ho ya fertilizers ko lekar ye sab directly Indian manufacturing aur Indian growth ko support karenge. Ye sab us waqt ho raha hai jab US ke kuch steps Bharat ki growth aur manufacturing sector ko hurt kar rahe hain.
Lekin iske badle China apna propaganda zaroor chalayega. Wahan ki media aur officials ye message spread karenge ki Bharat ne Taiwan ko China ka part maan liya hai aur ye sab help is wajah se mili. Chahe ye poori baat jhooth ho par apni janta ke samne China is narrative ko push karega.
Aur ab agli badi news tab hogi jab PM Modi China me SEO Summit ke liye jayenge. Wahan par kuch bade announcements hone ki sambhavna hai. Saath hi India aur China ke beech border issue ko permanently resolve karne ki baat bhi discuss ho rahi hai taaki future me koi bhi chhoti military conflict ki wajah se dono deshon ke relations 5–6 saal ke liye thande bakshe me na chale jayein.
Main aapko updates deta rahunga jaise hi nayi khabrein saamne aati hain.
thank you for you attention fir kal milenge naye geopolitics ke naye tipic pe charcha karenge have a good day .
Post a Comment